Qu’elle n’a eu, & n’a pudicque corps,
Et si ne peult estre tant vertueuse
Qu’elle ne soit dicte voluptueuse,
Combien qu’il soit sans sur ce varier
Assez permis de se remarier
Selon sainct Pol, & qui se remarie
Ne peche point, mais bien se deuarie,
Car meilleur est auoir mary second
Que de brusler en luxure a mot rond,
Mais plus est sainct & a Dieu aggreable
Le noble estat des vefues tant louable,
Lequel estat en ses parfections
Conuient garder par six conditions.
La premiere est, que la vefue piteuse
Se doit monstrer, non iamais despiteuse,
Et par pitié nuict & iour prier Dieu
Deuotement en conuenable lieu
Y emploiant du iour vne partie
Sans qu’elle en soit distraicte ou diuertie
Par ieux, esbas, pour perte, ou pour grant gaing,
Pour long repos, ou aultre acte mondain.
Alors que Dieu deuotement on prie
De bouche & cueur, son esprit on destrie
De folz pensiers, a dieu seul l’applicquant,
En cueur deuot son cas luy explicquant,
En qu’oy faisant l’ame est es cieulx rauye
En toute ioye, a parler se conuye

Comme filler, tailler, couldre, ou broder,
Se garde bien nullement s’aborder
De folz pensiers, mais voiant son ouurage
Contemple dieu de tout  le sien courage.
Si quenoille a, en regardant le boys
Qui est tout droit, pense lors en la croix
Du bon Iesus, & voyant sa fillace
Pense on sainct corps de Iesus sans fallace,
Qui fut charpy comme fillace on faict,
Peigné, ferre, pour nostre seul meffaict
Par les Iuifz cheux Caiphe, & cheux Anne,
Ou blaphemeur sans cause on le condamne
Pense comment fut ce corps flagellé,
Baptu, meurdry, de coups interpellé,
Et couronné de poignantes espines,
Iniurié d’iniures tant supines,
Puis estendu sur la croix a l’enuers
Par les paiens trescruelz & peruers.
En regardant le fuseau dont on fille
Long & agu, d’entendement agille,
Pense aux gros cloux dont fut cloué Iesus
Par piedz & mains cruellement dessus
Celle grant croix, & puis en sa couronne
Quand son pezon verra, qui enuironne
Lagu fuzeau a manyer facil.
Et en fillant & regardant son fil
Qu’auec de leau tire de la fillace,